أفضل درس في الحياة




أفضل درس في الحياة 



في اليوم اللي تركت فيه الجامعة ، روحت أسلم على دكاترتي الجميليين ، كثير منهم كان لهم أثر كبير في حياتي ..

واحد منهم كتبي نصيحة محتفظة فيها لحد الآن ومعلقتها على لوحة الألهام ، بما أن تخصصي عمارة شبه لي مراحل الأنسان و إيش المفروض يسوي في هالمرحلة بالبناء .



# الطفولة هذي مسؤلية الأهل وتكون عبارة أساسات البناء ، التعليم هوا أهم وسيلة للبناء “ مو بس تعليم المدرسة “ ، بعدها تجي الهوايات ، تحفيز الأطفال على هواياتهم ، مساعدتهم في ممارستها ، السماح بالتجارب حتى لو كانو عارفين الأهل أنهم على غلط أتركوا لهم الفرصة للتجربة ، الصحة دورها مره كبير في بناء عادات صحية للطفل (عشان لما يشيب ما يصير آكثر مكان يروح له المستشفى) .. كل هالأشياء تخلق أنسان سليم الجسم والعقل ،واثق ،مثقف، قوي الشخصية ، مبدع . 

أنتوا كذا أديتوا واجبكم صح بعد كذا هذي مسؤلية الشخص في أنه يكمل البناء .

# العشرينات هنا مرحلة التصميم ، هذا الوقت الي فيه لازم تجرب ، تشتغل “عادي تشتغل أي شي “ ، لازم تفشل ، ترجع تجرب مره ثانية ، بس الأهم لا توقف ولا تخسر الي بنيته في الطفوله ، عندك الوقت والصحة والأرادة ، عيب لو ما أستغليتها .
أهم شي في نهاية هالمرحلة تكون أنت عارف أش سويت و أش حتسوي ووين حتروح ، لازم تكون واضح المسيرة في نهاية هالعقد . 

أهم شي لا توقف تجارب ولا تندم و لا تيأس .. ولو ما جات الفرصة أخلقها .

#الثلاثينات .. أنت هنا ببساطة أنتقلت من مرحلة المعماري للمهندس المدني ، الخطة قدامك والطريق قدامك ، هذا الوقت اللي انت فيه لازم تكون عارف أش تسوي أنت قاعدة تبني مو لك بس ، لك و لعائلتك ولنفسك بعد ثلاثين أو أربعين سنة ، البناء حيكون متعب بس أفتكر أنك قاعد تبني البيت الي حتعيش فيه باقي عمرك ، حاول الأخطاء في هالعمر تكون أقل .

* في هالمرحلة لا تنسى صحتك و لا تنسى عقلك ما نبغا نزور المستشفيات في الستينات . 

#الأربعين .. خلاص هذا الوقت اللي المفروض بيتك يكون جاهز و عايش فيه هالمرحلة أجمل مرحلة تأخذ من متعة العشرينات و جدية الثلاثينات ، ما يمنع من تطوير البناء في هالمرحلة ، عندك المال و الخبرة بس ما عندك الوقت .. لازم تكون خطواتك ذكية . 

* برضو لا تنسى صحتك والكلام الي قلناه .

# الخمسينات إلى السبعينات .. ولاشي ، المفروض أنك ما تسوي شي ، 30 سنة من الركض في الحياة .. هنا المفروض يكون جل أهتمامك لعائلتك ولأحبابك .

  • لو ما نسيت صحتك ، غالباً ما حتزور المستشفى في هالوقت إلا عشان النظارة .  

# السبعينات إلى ما ربي يكتب لك عمر ، هنا تجني ثمار هالتعب من جد ، تخلى عن كل مسؤلياتك و أشتري طيارة ، مو هذا العمر اللي باقي بتشيل هم أي شي غير وين حتسافر الأسبوع الجاي .

طبعاً لو ما سمعت الكلام ما حتسافر وحتروح المستشفى 😬




ليست هناك تعليقات:

إرسال تعليق